پارلاق یۉل سری
دوکتورین
قارانغی کونلرنینگ یۉقمی اداغی؟ سکوتنی یوتماق‌نینگ بیتمس‌می تونی؟
بیز «وطن»- دېیه اتلمیش بیر قاره جغرافیه‌ده یششگه محکوم‌میز. یېر و کۉکدن بو اۉلکه کۉرمه‌گن یاووزلیکلری قالمه‌دی. تقدیرنینگ اچّیق-اچّیق المینی تاتیب بۉلدیک، ینه قنچه ایچیرر آغولرین بیزگه قسمت دېگنی؟
بو یورتده ظلم و ستم تاباره اَوج آلیب کېله‌یاتیر، عدالتسیزلیک‌نینگ قاره کۉلکه‌سی آسمانیمیزدن اَریمه‌یپدی. آدملرنینگ کۉزی قاتیب، یوزلریده إیلت اېتگن یاروغلیکدن نشانه قالمه‌گن. إیچیگه یاووزلیک إین قوریب آلگن کبی، یخشی‌لیک بو توپراقدن منگو یوز اۉگیرگنده‌ی گۉیا!
بو حکمران وضعیتنی ایجابي تامانگه اۉزگرتیریش، بجه‌ریلمس إیشلرگه اۉخشه‌یدی. فایده‌سی بارمی؟ یۉقمی؟ اونگه مناسبت بیلدیریب، تصویرلشگه اختیاریمیزده بیرگینه چۉلاق قلم و قولاقلرگه یېتیب بارمس سۉزلر بار حاضرچه. شونده هم حق سۉزلر بۉغیزلرده توگولیب، تیلیمیزگه چیقمه‌ی توریبدی. سۉزنینگ کېسکیر تیغی کېسک إیله قیره‌لماقده.
احوال و وضعیتگه بیر قره‌ب باقینگ:
ده‌یدی اۉقلر تېگیب، یریم تنه‌سی آسمانگه آتینلگن باله‌سی‌نینگ جسدینی کۉریب فغان و فریاد کۉترگن آنه‌نینگ نیمه دېب ییغلشینی بیر کۉز اۉنگینگیزگه کېلتیرینگ-هه! اوستی یوپون، بیر بُرده ناگه زار، قانگه بېلنگنچه تصادفاً تیریک قالگن گۉدکلرینی بغریگه آلیب، جان هاووچلب، اۉپکه-بغیر چنگلـله‌یاتگن آنه‌لرنینگ ناله‌سینی کیم اېشیتسن اخیر؟ مونگلی میتتی‌گینه قیزچه‌نینگ قۉلیدن توتگنچه، «قنی اېس‌سیز آته‌نگ؟»- دېیه اۉلیکلر آره‌سیدن یۉقالگن باشقه فرزندینی قیدیریش بیلن آواره آنه‌لردن کیم خبر آلسین؟ قانلرگه بۉیلگن اۉغلی‌نینگ یوزیگه یوزینی سوریب، بېوه و بېچاره قالگن قیزی حسرتیده کوییب ادا بۉلگن، یوره‌گی قت-قت تیلینگن آته‌نینگ ناچار آوازینی بیراو اېشیته‌دی- دېیسیزمی؟
کېلینلیک چیرایلی کییمی و تـقینچاقلری بیلن اۉزینی گـُل برگیگه اۉخشه‌تیب، ناز ساچیب تورگن قیزنینگ بخت و ارمانی بیر زومده کۉمیلیب کېتیشی اۉکینچ اېمس‌می؟ قنی اېدی اۉشه کۉز یاشلری خزان کېتگن یپراق‌نینگ ینه قیتیب بوتاغیگه اۉلسه؟!
نیمه بۉلدی سېنگه وطنیم؟ کۉرگولیکلرینگ‌نینگ یۉقمی اداغی؟
اې وطن اولادی! و اې یوره‌گی دېنگیز کبی جۉش اوریب، تامیرلریده غیرت و همت قانی قـَینب تورگن خلق‌پرور اۉغلان!
همت اېت، شهامت و فداکارلیک کۉرست، کوچینگنی تۉپله، فکرینگنی کېنگ قیل و دنیا قره‌شینگ إیله شانلی اجدادیمیزنی اېسینگگه آل! بویوک ملت‌نینگ کېله‌جگینی اۉز قۉللرینگ-له قوریشگه توتین. همت اېت، بو یۉلده آته اۉغوز خان، توماریس آنه، آلپ اېرتونگه، چۉپان شیراق و قهرمان سپېته‌مېن‌لرنینگ غیرتی یارله‌قه‌سین سېنی! اېرکین یشش، اۉزگه‌گه باش اېگمسلیک، وطن‌پرورلیک، خلق‌سېورلیک و عدالت اۉرنتیش یۉلیده سېنینگ کوچینگگه کوچ قۉشسین؛ شهامت و فداکارلیک کۉرست. آدملر بیر-بیریگه منفعت یېتکزیشلرینی، اۉزنی باشقه‌لردن اوستون کۉرمسلیکنی ایش و کوره‌شده اثباتله. عادي آدملر و رهبرلر، سېن خلق خذمتیده بۉلیشینیگنی یخشیلب انگله‌سین؛ اېسینگنی ییغ، کوچینگنی تۉپله، هر بیر ناباب ایشگه پریشان بۉلمه‌‌یین دېسنگ. روحي ددیللیک و قلبده‌گی قدرت إیله اولوغ مقصدلر سَری اینتیل؛ فکر و فعلینگنی کېنگ توت، سېندن بیراو رنجیده بۉلمه‌سین. مشقتلر بېلینگنی بوکه‌‌بیلمه‌سین. اېل امیدی سېنده، سېندن مظلوملر نجات کوتماقده. بوکونلر اونوت بۉلیشیگه جسارت کۉرست.
همت اېت، همت اېت که یسّوي‌لرنینگ آلقیشی وجودینگگه کوچ بېرسین؛ یوسف خاص حاجب، کاشغري بابام، مولانا لطفي، گدایي، سکاکي، آتایي، نوایي و بابر‌لر روحی سېنگه مدد بېرسین. تینیق فکرلی و علم و هنرگه قدر بېرگین که زمان ابنِ سینالری و البېروني‌لری بارلیق سِرلرینی آشکار اېته‌بېرسین. میرزا اولوغ‌بېک کشف اېتگن یولدوزلر باشینگ اوزره یـَره‌قلب تورسین. شونده‌ی قرارلی و قاطع بۉلگین که چینگیز خان‌نینگ کېسکیر اراده‌سی سېن بیله یار بۉلسین؛ عدالتلی و خلق‌سېور بۉلگین که تېموري‌لر و بابوري‌لرنینگ شکوهلی دولتینی عالم خلقی قـَیته-قیته اېسله‌سینلر؛ شونده‌ی ایش توت که جلال‌الدین منگوبېردی‌نینگ افسانه‌لری ینه-ده خاطره‌لرده تازه‌لنسین. همت اېت، همت که عصرلر قعریده اۉز صلابتینی ییتیرگن خلقینگ قـَیته جانلنسین! همت اېت، هیچ بیر پیت ستمگه باشی اېگیلمه‌گن ملتینگ ینه کوچلنسین؛ «بیز کیم، مَلِک توران، امیرِ تورکستان»- دېیه عالم ارا اۉزی‌نینگ شان و شوکتینی ینه نمایان اېتسین بو اولوغ خلق.
دنیا اۉزگره‌جک، ملتیمیز قۉزغالنه‌جک-اویغانه‌جک، عدالت اۉرنتیله‌جک، باشلردن ظلم سایه‌سی یۉق اېتیله‌جک، علم و دانالیک ایشیمیز اساسی بۉله‌جک، دولتلریمیز شکوه تاپه‌جک؛ اجدادیمیزنینگ روحلرینی اۉزیمیزگه یار اَیلب، یۉلگه چیقه‌یلیک، رېجه توزه‌یلیک، بیرلشه‌یلیک و بیر-بیر بیله قۉللشه‌یلیک، بارلیگیمیز صلابت تۉکیب تورسین.
مطالب مرتبط
